MANIFESTO DO COMITÉ DE SOLIDARIEDADE COAS REPRESALIADAS POLÍTICAS

Actualmente estamos a vivir unha escalada represiva brutal que resposta ao crecemento do descontento social por mor dunha crecente desigualdade que está levando ao aumento da mobilización social. Esta represión encádrase dentro da situación actual de crise, pero non é nada novo, senón unha necesidade de calquera Estado capitalista para conter as protestas do pobo.

Neste contexto de loita polos dereitos e conquistas históricas das traballadoras, aparecen novas leis de terror como a nova Lei de Seguridade Cidadá e a reforma do Código Penal, que endurece aínda máis o castigo contra todas aquelas que erguen a voz e loitan, estendendo a represión a sectores da poboación cada vez máis amplos. Tanto ten que sexa unha estudante, unha traballadora, unha parada ou unha migrante, a brutalidade policial, as detencións... cada vez van a peor.

Estas agresións sófrenas especialmente as persoas presas. Así encadramos o noso proxecto dentro dunha loita anticarceraria e antirrepresiva ampla, pois non damos a este estado criminal a lexitimidade para encerrar a ninguén, xa que sabemos que a maior parte dos delitos non existirían sen desigualdades sociais, sumándolle a isto que o que lles espera a estas persoas en prisión son unhas condicións de vida inhumanas. Dentro desta loita ampla, centramos a nosa actividade na loita pola liberdade das máis de 400 presas políticas no Estado Español, 15 delas galegas, dispersadas a miles de quilómetros da súa familia.

Aínda que xa existen plataformas e iniciativas solidarias e antirrepresivas, nós queremos construír un movemento solidario unitario e amplo, que supere as divisións e os sectarismos, ao igual que tratamos de vincular esta coa loita xeral contra a oligarquía financeira española. Só así poderemos lograr os nosos obxectivos.

Por todo isto, xorde o noso Comité de Solidariedade cas Represaliadas Políticas (CSRP), no que conflúen persoas de diversas sensibilidades políticas, co obxectivo de traballar e actuar unidas de cara a difundir a solidariedade e facerlle fronte á represión.

O CSRP está aberto á colaboración con individuos e colectivos na causa solidaria e antirrepresiva e prestaremos a nosa axuda a toda aquela que estea a sufrir a represión. Non obstante, o Comité é independente, e manterase separado orgánica e economicamente de calquera organización ou institución, especialmente daquelas que sexan cómplices ou parte activa na represión.

O CSRP propón unha serie de puntos mínimos polos que loitaremos e os cales reivindicaremos:

1. Amnistía! Liberdade para TODAS as presas políticas e sociais.

2. Derrogación de todas as leis represivas, como a Lei de Seguridade Cidadá, a Lei Antiterrorista ou a Lei de Partidos, o réxime FIES, etc.

3. Disolución do tribunal político herdado do franquismo chamado Audiencia Nacional.

4. Disolución de todos os corpos represivos do Estado.

5. Anulación de calquera sanción administrativa ou penal en proceso por motivos políticos.

6. Liberdades políticas e sindicais plenas para a clase obreira e o pobo. Polo respecto ás liberdades de expresión, asociación, reunión, folga  e manifestación.

7. Supresión de todos os CIEs do estado español.

8.  Xulgamento dos responsables políticos e policiais da represión, torturas, crimes de Estado, etc. 

9. Esixencia activa do respecto da dignidade de calquera presa.

Contra a represión, unión e solidariedade!

Comité de Solidariedade coas Represaliadas Políticas (CSRP).

Compostela, novembro 2014.

______________________________________________________________________________________________

Atualmente estamos a viver umha escalada repressiva brutal que resposta ao crescimento  do descontento social por mor dumha medrança da desigualdade que está levando ao aumento da mobilizaçom social. Esta repressom enquadra-se dentro da situaçom atual de crise, mas nom é nada novo, só umha necessidade de qualquer Estado capitalista para conter as protestas do povo. 

Neste contexto de luita polos direitos e conquistas históricas das trabalhadoras, aparecem novas leis de terror como o projeto de nova Lei de Segurança Cidadá e o de reforma do Código Penal, que endurecem aínda mais o castigo contra todas aquelas que erguem a sua voz e luitam, estendendo a repressom a sectores da populaçom cada vez mais amplos. Tanto tem que for umha estudante, umha trabalhadora, umha parada ou umha imigrante; a brutalidade policial, as detençons... cada vez vam a pior.

Estas agressons sofrem-nas especialmente as pessoas presas. Assim, situamos o nosso projeto dentro dumha luita anti-carcerária e anti-repressiva amplas, pois nom damos a este Estado criminal a legitimidade para encerrar a ninguém, já que sabemos que a maior parte dos delitos nom existiriam sem desigualdades sociais, somando a isto que o que lhes espera a estas pessoas na prisom som umhas condiçons de vida inhumanas. Dentro desta luita ampla, centramos a nossa atividade na luita pola liberdade das quase 400 presas políticas do Estado espanhol, 15 delas galegas, dispersadas a centos e miles de quilómetros das suas famílias.

Mália existirem já plataformas e iniciativas solidárias e anti-repressivas, nós queremos construir um movimento solidário unitário e amplo, que supere as divisons e os sectarismos, ao igual que tratamos de vincular este com a luita geral contra a oligarquia financeira espanhola. Só assim poderemos lograr os nossos objetivos.

Por todo isto xorde o Comité de Solidariedade com as Retaliadas Políticas (CSRP), no que confluem pessoas de diversas sensiblidades políticas com o objetivo de trabalhar e atuar unidas de cara a difundir a solidariedade e fazer-lhe fronte à repressom.

O CSRP está aberto à colaboraçom com indivíduos e coletivos na causa solidária e anti-repressiva e prestaremos a nossa ajuda a toda aquela que estiver sofrento a repressom. No entanto, o Comité é independente e manterá-se separado orgânica e economicamente de qualquer organizaçom ou instituiçom, especialmente daquelas que forem cúmplices ou parte ativa na repressom.

O CSRP propom umha série de pontos mínimos para reinvindicar e polos quais luitaremos:

1. Amnistia! Liberdade para TODAS as presas políticas e sociais.

2. Derrogaçom de toda a legislaçom repressiva, como a Lei de Segurança Cidadá, a Lei Anti-terrorista, a Lei de Partidos, o regime FIES, etc.

3. Dissoluçom do tribunal político herdado do franquismo chamado Audiência Nacional.

4. Dissoluçom de todos os corpos repressivos do Estado.

5. Anulaçom de qualquer sançom administrativa ou penal por motivos políticos. 

6. Liberdades políticas e sindicais plenas para a classe obreira e o povo. Polo respeito às liberdades de expressom, associaçom, reuniom, greve e manifestaçom.

7. Supressom de todos os CIEs.

8. Julgamento dos responsáveis políticos, policiais e militares da repressom, torturas, crimes de Estado, etc.

9. Exigência ativa do respeito da dignidade de qualquer presa.

Contra a repressom, uniom e solidariedade!

Comité de Solidariedade com as Retaliadas Políticas (CSRP)

Compostela, novembro de 2014.